സൗദി അറേബ്യയിലേക്കുള്ള വിമാന സർവീസുകൾ റദ്ദാക്കിയത് ഒക്ടോബർ 24 വരെ നീട്ടി പ്രമുഖ യുഎഇ വിമാനക്കമ്പനികളായ എത്തിഹാദ് എയർവേയ്‌സും ഫ്ലൈദുബായും. സുരക്ഷാ മുൻകരുതലുകളുടെ ഭാഗമായാണ് ഇരു കമ്പനികളും തങ്ങളുടെ സർവീസുകൾ താൽക്കാലികമായി നിർത്തിവെച്ചിരിക്കുന്നത്.
എത്തിഹാദ് എയർവേയ്‌സ് റിയാദ്, ദമാം, ജിദ്ദ എന്നിവിടങ്ങളിലേക്കുള്ള എല്ലാ വിമാന സർവീസുകളും ഒക്ടോബർ 24 വരെ റദ്ദാക്കിയിട്ടുണ്ട്. യാത്രക്കാർക്കുണ്ടായ തടസ്സത്തിൽ ഖേദം പ്രകടിപ്പിച്ച കമ്പനി, നിലവിലെ സാഹചര്യം നിരന്തരം നിരീക്ഷിച്ചു വരികയാണെന്നും മാറ്റങ്ങൾ ഉണ്ടാകാൻ സാധ്യതയുണ്ടെന്നും അറിയിച്ചു. ബാധിക്കപ്പെട്ട യാത്രക്കാർക്ക് ടിക്കറ്റ് പുനഃക്രമീകരിക്കുന്നതിനായി പ്രത്യേക സഹായങ്ങൾ നൽകുന്നുണ്ടെന്നും യാത്രക്കാരുടെയും വിമാന ജീവനക്കാരുടെയും സുരക്ഷയ്ക്കാണ് പ്രഥമ പരിഗണനയെന്നും എത്തിഹാദ് വ്യക്തമാക്കി. യാത്രക്കാർ വിമാനത്തിന്റെ നിലവിലെ അവസ്ഥ അറിയാൻ ഔദ്യോഗിക വെബ്‌സൈറ്റ് പരിശോധിക്കണമെന്നും നിർദ്ദേശമുണ്ട്.
അതേസമയം, അബ്ഹ, ദമാം, റിയാദ് ഉൾപ്പെടെ സൗദിയിലെ വിവിധ നഗരങ്ങളിലേക്കുള്ള വിമാനങ്ങളാണ് ഫ്ലൈദുബായ് ഒക്ടോബർ 24 വരെ റദ്ദാക്കിയിട്ടുള്ളത്. നിലവിലുള്ള പ്രത്യേക സാഹചര്യം കാരണം സൗദിയിലേക്കുള്ള ഷെഡ്യൂൾ ചെയ്ത സർവീസുകളിൽ തടസ്സങ്ങൾ നേരിടാൻ സാധ്യതയുണ്ടെന്ന് ഫ്ലൈദുബായ് വക്താവ് വ്യക്തമാക്കി. സാഹചര്യങ്ങൾ സസൂക്ഷ്മം നിരീക്ഷിച്ചു വരികയാണെന്നും ഔദ്യോഗിക മാധ്യമങ്ങളിലൂടെ ഉപഭോക്താക്കൾക്ക് കൂടുതൽ വിവരങ്ങൾ നൽകുമെന്നും എയർലൈൻ അറിയിച്ചു.
ഒക്ടോബർ 10-ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തെ തുടർന്നാണ് യുഎഇ വിമാനക്കമ്പനികൾ സൗദിയിലേക്കുള്ള സർവീസുകൾ നിർത്തിവെക്കാൻ തുടങ്ങിയത്. ഈ ആക്രമണത്തിൽ 12 പേർ കൊല്ലപ്പെടുകയും 309 പേർക്ക് പരിക്കേൽക്കുകയും ചെയ്തതായി സൗദി സിവിൽ ഏവിയേഷൻ അതോറിറ്റി വ്യക്തമാക്കിയിരുന്നു. തുടർന്നുണ്ടായ ആവർത്തിച്ചുള്ള ആക്രമണ ഭീഷണികളെ തുടർന്നാണ് വിമാനത്താവളത്തിന്റെ പ്രവർത്തനം താൽക്കാലികമായി നിർത്തിവെക്കുന്ന സമയം അതോറിറ്റി ദീർഘിപ്പിച്ചത്.
Content Highlights: UAE airlines have extended cancellations and suspensions on several routes to Saudi Arabia until October 24, 2026, amid regional security concerns. Passengers are advised to check their flight status before travelling.